მენიუს ინჟინერია: როგორ გაზარდოს მენიუმ საშუალო ჩეკი

რას ნიშნავს მენიუს ინჟინერია

მენიუ ჩვეულებრივ იმიტომ იწერება, რომ სამზარეულოს ასე გამოსდის. მენიუს ინჟინერია სხვა კითხვას სვამს: რომელი კერძი რამდენ ფულს ტოვებს რესტორანში და რამდენად ხშირად ირჩევენ მას. ორივე ციფრი ისედაც გაქვს, მხოლოდ ერთმანეთის გვერდით არასდროს დაგიწერია.

ერთი მნიშვნელოვანი დაზუსტება: აქ არა პროცენტული მარჟა მუშაობს, არამედ წვლილი ლარებში. კერძი, რომელსაც 70 პროცენტი მარჟა აქვს და 12 ₾ ღირს, 8,4 ₾-ს ტოვებს. კერძი 45 პროცენტით და 34 ₾ ფასით, 15,3 ₾-ს. მეორე უკეთესია, თუმცა პროცენტში უარესად გამოიყურება.

ოთხი კვადრატი

ვარსკვლავი

რესტორნის საყრდენი. ამ კერძს არ ვეხებით: არც ფასს, არც რეცეპტს, არც პორციას. ერთადერთი, რაც უნდა გავაკეთოთ, არის მისი დაცვა და თვალსაჩინოება. ვარსკვლავი მენიუს პირველ ეკრანზე უნდა იდგეს, ფოტოთი და გამორჩეული ბარათით.

ცხენი

ბევრი უკვეთავს, მაგრამ ცოტას ტოვებს. ხშირად ეს სწორედ ის კერძია, რომლითაც რესტორანი ცნობილია, ამიტომ მისი ამოღება არ შეიძლება. სამი სვლა მუშაობს: პორციის თვითღირებულების შემცირება ხარისხის შენარჩუნებით, ფასის მცირე კორექცია და მისი დაწყვილება მაღალმარჟიან დამატებასთან.

თავსატეხი

ყველაზე საინტერესო კვადრატი, რადგან აქ სწრაფი მოგებაა. კერძი მომგებიანია, უბრალოდ მას ვერ ხედავენ ან ვერ ხვდებიან, რა არის. ციფრული მენიუ ამას პირდაპირ გიჩვენებს: სტატისტიკაში ერთმანეთის გვერდით დგას, რამდენჯერ გაიხსნა კერძის ბარათი, რამდენჯერ შეუკვეთეს და რა თანაფარდობაა ამ ორს შორის.

ძაღლი

არც ხშირად უკვეთავენ და არც მოგებას ტოვებს. სამაგიეროდ მენიუს სიას აგრძელებს და სამზარეულოს ცალკე მარაგს ატანინებს. ასეთი კერძი მენიუდან უნდა წავიდეს. თუ ის ვინმეს საყვარელი კერძია, სეზონურ სიაში გადაიტანე.

როგორ გავზომოთ, პრაქტიკულად

1. 1
   აიღე ერთი თვის შეკვეთები

   ერთი კვირა ცოტაა, სამი თვე უკვე სეზონს რევს. ერთი სრული თვე ოპტიმალურია.

2. 2
   დაწერე თითო კერძის თვითღირებულება

   პროდუქტი, რომელიც პორციაში შედის. შრომა და კომუნალური აქ არ შედის, ისინი მთელ მენიუზე ნაწილდება.

3. 3
   გამოთვალე წვლილი ლარებში

   ფასი მინუს თვითღირებულება. ეს ის თანხაა, რომელსაც კერძი კონკრეტულად ტოვებს.

4. 4
   გაავლე ორი ხაზი

   საშუალო წვლილი და საშუალო რაოდენობა. ორი ხაზი მენიუს ოთხ კვადრატად ჭრის.

5. 5
   შეცვალე თვეში ერთი რამ

   თუ ერთდროულად შეცვლი ფასს, ადგილს და ფოტოს, ვერასდროს გაიგებ, რომელმა იმუშავა.

სად უყურებს თვალი ციფრულ მენიუში

ქაღალდის მენიუს კვლევები ხშირად ლაპარაკობს „ოქროს სამკუთხედზე", გვერდის ცენტრსა და ზედა მარჯვენა კუთხეზე. ტელეფონზე ეს არ მუშაობს, რადგან ეკრანი ვიწროა და შიგთავსი ვერტიკალურად სრიალებს.

ტელეფონზე მოქმედებს უფრო მარტივი წესი: პირველი ეკრანი და კატეგორიის პირველი ორი კერძი. ამიტომ ციფრულ მენიუში ინჟინერია ძირითადად თანმიმდევრობით კეთდება. კატეგორიის თავში ვარსკვლავი და თავსატეხი დგება, ცხენი შუაში, ძაღლი კი საერთოდ არა.

ფასის ჩაწერა: ორი წვრილმანი

• ფასები ერთ სვეტში, ტაბულარული ციფრებით. როცა ციფრები ერთმანეთის ქვეშ ზუსტად დგება, სტუმარი მენიუს კითხულობს და არა ფასების სიას.
• მრგვალი რიცხვი ათწილადის გარეშე. „₾ 28" და არა „₾ 28.00": ორი ნული ფასს გრძელს ხდის და არაფერს ამატებს. gemo.menu-ზე ორივე წვრილმანი ავტომატურია.

დამატებები, ყველაზე იაფი ზრდა

საშუალო ჩეკის ზრდის ყველაზე იაფი გზა ახალი კერძი არ არის. ეს დამატებებია: ზომა, გვერდითი კერძი, დანამატი. მათი თვითღირებულება დაბალია, ხოლო გადაწყვეტილება სტუმარს უკვე მიღებული აქვს, ის მხოლოდ ავსებს.

ციფრულ მენიუში ეს ორგანულად ჯდება: კერძს რომ ხსნი, დამატებები იმავე ფანჯარაშია და ოფიციანტს შეხსენება არ სჭირდება. ქაღალდზე ეს ან წვრილი შრიფტით ეწერა, ან საერთოდ არ ეწერა.